CEBU, Philippines - Tulo ka nagkalainlaing kaso ang gipasaka sa unom ka konsehal sa dakbayan sa Toledo batok ni Mayor John Henry “Sonny†Osmeña ug ubang opisyal sa buhatan sa Ombudsman kagahapon.
Sila si Konsehal Ricardo Pepito, Antonio Borja Jr., Rogelio Caburnay, Louis Nicholas Espinosa, Helen Jill Espinosa ug Edgardo Aguilar, mayoriya sa mga sakop sa konseho, ang giabagan ni Atty. Judilyn Tapia sa pagsang-at sa kaso.
Sila si Osmeña, Bise Mayor Antonio Yapha Jr., Konsehal Leo Dolino, Merly Abad, ug Zosimo Abellanosa gipasakaan og kaso labot sa giingong ilegal nga pagpasar sa 2014 budget nga walay korum niadtong Marso 27. Sayo niini si Regional Trial Court Executive Judge Hermes Montero miluwat og 20 ka adlaw nga Temporary Restraining Order sa pagdili paggasto sa P619 milyones nga budget.
Niadtong Abril 16, si Osmeña nipahibawo sa mga kawani nga malangan ang ilang sweldo gumikan sa iyang pagtuman sa TRO. Kini ang hinungdan nga nisang-at usab og laing kaso ang unom ka konsehal batok ni Osmeña ug iyang secretary nga si Rebecca Baladya sanglit ubos sa reenacted budget, magpadayon ang sweldo sa mga kawani.
Gikataw-an lang ni Osmeña ang gipasakang kaso sa unom ka konsehal sanglit nagpakita lang nga wala sila kasabot sa ilang gibuhat. (BANAT NEWS)