CEBU, Philippines - Napisat ang lawas sa usa ka lalaki human kini nadat-ogan sa pison nga iyang gimaneho samtang swerteng nakalayat ang duha niya ka mga kauban dihang padung na sila katagak sa kimba sa Barangay Lubo, Sogod kagahapon sa buntag.
Ang namatay giila sa kapolisan nga si Pepito Moneva, trabahante sa Department of Public Works and Highways, samtang nangaangol sila si Rene Boy Cinido ug si Glen Villegas nga misakay sa maong pison. Si PO1 Tirso Sol, desk officer sa Sogod Police Station nga nahinabi sa Banat News miingon nga ang mga biktima gikan Borbon padulong unta sa Mohon sa samang lungsod.
Apan dihang naabot kini sa nahitaboan kalit lang mibuto ang luyo nga gomang ligid hinungdan nga nawad-an og kontrol si Moneva ug nadiretso kini sa kimba, samtang nakalayat sila si Cinido ug Villegas. (BANAT NEWS)