CEBU, Philippines - Patay ang usa ka sakop sa anti-crime group nga Bantay Bayan human gipusil sa makadaghan nga higayon sa Barangay Pitalo, San Fernando sa miaging hapon.
Ang biktima mao si Franklin Sayson Bartido, 46, taga Barangay Mainit, Naga City. Sumala pa ni SPO2 Victor Cuyno sa San Fernando Police Station nga nahinabi sa Banat News, nga nagmotor ang biktima paingon sa siyudad sa Carcar dihang kalit kining gisikitan sa laing motor nga dunay plakang CS 7667.
Ang maong itom nga motor dunay sakay nga duha ka lalaking nagtaptap sa ilang mga nawong ug diretsong mipaulan og bala sa biktima hinungdan sa pagkatumba niini, apan ang backrider mikanaog gitiwasan pa gyud kini pagpusil. Patay na si Bartido pag-abot sa Carcar District Hospital , nakuha sa crime scene ang onse ka basiyo sa kalibre .45, ingon man ang mga ID’s sa biktima sama sa Bantay Bayan, PNP Anti Crime Group, ug uban pang personal nga gamit. Matud sa asawa sa biktima nga si Estrelita Bartido, adunay “kabit†ang iyahang bana nga gipanganlan og “Jane†nga taga Mindanao ug gituohang GRO sa Toledo City. (/EIM)(BANAT NEWS)