CEBU, Philippines - Giawhag sa City Traffic Operations and Management ang mga naa sa gobyerno nga mosunod sa lagda sa trapiko ug dili mag-abusar aron dili sundon sa uban.
Kini human usa ka sakyanan sa Cebu City Hall ang nag-parking sa no parking zone sa may dalan Pelaez hinungdan nga gi-clamp sa mga sakop sa CITOM niadtong Sabado sa gabii.
Matud pa ni Joy Tumulak, operations officer sa CITOM, nga ang gibuhat sa ilang mga sakop nagpakita lang nga wala sila’y gipili kun kinsa’y dakpon bisan og anaa pa sa gobyerno nagtrabaho sanglit maoy mando ni Mayor Michael Rama.
“Duna mi instructions gikan ni Mayor nga bisan og ang iyang kaugalingong sakyanan makalapas sa lagda sa trapiko iyang ipadakop mao na nga usa na sa among nadakpan ang multicab nga red plate,†matud ni Tumulak.
Gawas sa maong kalapasan, usa ka botelya sa beer ang nakit-an sa CITOM sulod sa sakyanan.
Kagahapon nipahigayon og clarificatory conference sila si City Legal Officer Atty. Gerone Castillo ug City Administrator Dra. Lucille Mercado nga gitambungan nilang Engr. Ruel Tahom kinsa maoy nagpirma sa memorandum receipt sa multicab nga plakang SJM 459; Arnold Lauron nga tag-iya sa bag nga nakit-an sa multicab; Severino Cardiente, driver; ug Perzentino Caruana.
Usa sa gisusi kun nganong gigamit ug naabot ang sakyanan sa maong lugar nga dili na oras sa tingtrabaho.
Samtang gihimakak ni Lauron nga siya ang hinungdan nga na-clamp ang sakyanan.
Matud niya nga nahabilin lang ang iyang bag sulod sa sakyanan ug gitawagan unta niya pagsuway ang drayber apan dili makontak.
Si Rama miingon nga manubag gyud ang responsabli sa maong kaso tungod kay walay gipili ang balaud. (BANAT NEWS)