CEBU, Philippines - Alang sa paglikay sa risgo ug kahasol sa mga kawani sa dakbayan sa Talisay sa pagkuha sa ilang sweldo si Konsehal Dennis Basillote misugyot nga maglusad og Automated Teller Machine (ATM) payroll system tali sa Land Bank diha sulod sa City Hall building.
Si Bise Mayor Romeo Villarante mimando sa committee on laws ug committee on finance sa pagpahigayon og pagtuon sa maong sugyot ni Basillote.
Si Basillote mipalabang og resolusyon sa paghatag og pagtugot kang Mayor Johnny De los Reyes sa paggama og Memorandum of Agreement (MOA) tali sa Land Bank sa pagbukas sa siyudad og payroll fund account alang sa mga kawani sa city hall.
Gipasabot ni Basillote nga ang mga kawani sa city hall mag-transact og business o mag-withdraw sa ilang mga sweldo adto sa Land Bank sa P. Del Rosario branch sa dakbayan sa Sugbo.
Ang mga kawani kinahanglan pang mobiyahe og layo-layo diin nakahatag kini og risgo kanila.
Apan kung aduna na unya’y Land Bank ATM diha sulod sa City Hall building maluwas sa risgo ang mga kawani ug dali na usab kaayo ang ilang transaksiyon panahon nga magkuha sila sa ilang sweldo.
Kung tugotan ang maong sugyot ni Basillote ubos sa MOA ang kagamhanan sa siyudad maka-avail kini sa facilities sa Land Bank sama sa ATM machine.
Ang mga regular nga kawani maka-avail na unya sa ATM payroll account ug cash card accounts alang sa mga contractual nga kawani.
Ang matag kawani duna lang unya kini P100 nga initial balance sa pagbukas sa ilang Savings Payroll Account. Dugang ni Basillote nga ang maong sistema maghatag unya og kasayon sa mga kawani sa pagpahigayon og transaksiyon sa ilang sweldo 24/7. (BANAT NEWS)