CEBU, Philippines - Lain na sab nga deli-very van ang nabiktima sa pagpanulis sa siyudad sa Carcar, niadtong Mayo 9, alas 5 sa hapon.
Nagpakitabang sa Carcar Police Station ang manager sa usa ka kompanya sa sigarilyo nga sakay sa delivery van nga naila nga si Nilo Azarcon, taga Maguikay, Mandaue City.
Kauban sa manager sa maong biyahi ang helper nga si Geober Semblante, taga lungsod sa Dumanjug, Roldan Camasura, junior salesman ug ang driver nga si Rico Villas taga lungsod sa Dumanjug.
Saysay ni Azarcon sa kapulisan nga samtang paingon unta sila maghatud og sigarilyo sa Carcar, pag-abot sa may Barangay Perrelos sa maong siyudad, kalit silang gibabagan sa usa ka motorsiklo nga kolor itom nga adunay sakay nga duha ka tawo nga nag-helmet.
Ang mga sakay niini mition og kalibre .45 nga pistola ug mideklarar og tulis. Wala’y nahimo ang mga biktima kun dili sa paghatag sa ilang mga cash ug gamit ngadto sa mga tulisan.
Nakuha sa duha ka tulisan ang P20 mil nga cash, mahalon nga relo, usa ka bracelet, duha ka cellphones, usa ka laptop ug mga ATM cards.
Wa pa gyud matagbaw ang duha ka tulisan gipasulod pa ang mga biktima sa likod nga bahin sa ilang delivery van ug gipadlakan.
Matod pa nga human sa maong panghitabo, dali usab nga misibat ang duha ka mga tulisan subay sa national highway sa maong lugar. (BANAT NEWS)