CEBU, Philippines - Ang pagsaka sa krimen sa atong katilingban, mugna sa kakuwang sa pagtoo ngadto sa Labaw nga Makagagahum ug ang kawad-on nga nagpugos kanila sa pagbuhat og krimen aron lang nga mabuhi.
Kini maoy reaksyon ni Cebu Archbishop Jose Palma kalabot pagsaka sa krimen karon sa Metro Cebu.
Matud ni Palma nga ang nahitabo karon magsilbi untang pahimangno sa tanan nga maningkamot nga mahibalik sa sabakan sa Ginoo.
Wa kalikayi sa Arsobispo ang paghatag sa iyang komento niining pagsaka sa krimen kay matud niya may kalabutan gyud niini ang sitwasyon karon sa katawhan diin ang kalisod maoy magtukmod kanila nga mohimo og krimen aron lang mabuhi.
Hinoon ang Arsobispo mitataw nga dako og papel ang katawhan aron mokunhod ug malikayan nga adunay krimen nga mahitabo pinaagi sa paningkamot ug pag-ampo. (BANAT NEWS)