CEBU, Philippines - Mopahigayun og libreng training ang Philippine Life Saving Society kauban ang Philippine Navy ug Philippine Coast Guard labot sa pagluwas og kinabuhi atol sa lunod sa sakyanan sa kadagatan.
Sa PIA-7 Forum kagahapon, gipadayag ni Larry Joie S. Alaga, secretary-general sa PLSS, nga matag pamilya kinahanglang adunay usa nga makamaong moluwas sa malumos.
Si PCG Commander Neil Azcuna mipahibawonga mopahigayun sila og inspeksiyon sa mga resorts karong Mayo 17 aron masuta kung aduna bay mga lifesavers o life-guards nga gidestino.
Matud ni Azcuna nga adunay multa ang mga resorts kung masuta nga walay lifeguards.
Si Lt. James B. Reyes, public affairs officer sa Naval Forces Central, miingon nga nagtanyag sila og trainings kauban ang CG ug kini libre sa tanang gusto nga moboluntaryo.
Ang PLSS adunay 20,000 ka mga volunteers sa tibuok Pilipinas ug modawat gihapon sila og mga bag-ong sakop ug gani adunay libreng training sa Sta. Fe, Cebu karong Mayo 15 hangtud sa 18.
Giawhag sa PLSS, PN ug PCG ang mga Sugbuanon sa pagsuporta sa maong kalihukan aron malikayan ang kamatayon kung may trahedya. (BANAT NEWS)