CEBU, Philippines - Gihimakak ni Talisay City Mayor Johnny De los Reyes ang report sa Commission on Audit (COA) labot sa giingong duplication ug overlapping sa trabaho sa regular ug job order nga kawani sa City Hall ubos sa iyang administrasyon.
Base sa Audit Observation Memorandum sa COA nga gipetsahan og Abril 7, 2014, ang gitukod nga Project Monitoring Team, Job Order Monitoring Team, Flying Squad Task Force Patrol, Indigent Pharmacy, Text to the Mayor ug Mayor’s Task Force (MTF) duplikasyon kini sa trabaho sa City Engineering Office, Civil Security Unit (CSU), City of Talisay Traffic Operation and Development Authority (CT-TODA), City Health Office ug Talisay Rescue Emergency Action Team (TREAT). Apan si De los Reyes sa iyang suwat ngadto kang State Auditor Daisy Bercede nagkanayon nga posibleng ang iyang gitukod nga buhatan dunay susamang trabaho sa regular nga mga buhatan apan duna kini lahi nga gimbuhaton sa pagpalambo sa mga serbisyo sa siyudad.
Iyang gisanglitanan ang Flying Squad Task Force nga ang trabaho mao ang pag-regulate sa traffic ug mamadlong sa mga ambulant vendor daplin sa karsada atol sa peak hours kung ang maong lugar walay CT-TODA. Matud sa mayor nga ang Flying Squad maoy mo-report kung dunay mga ilegal nga istruktura nga gipabarug ug mao usab kini ang mitabang sa pagbantay sa mga magpataka og labay sa basura. Ang Indigent Pharmacy giingong nag-duplicate usab sa trabaho sa City Social Welfare. Apan matud ni De los Reyes nga ang Indigent Pharmacy dili duplikasyon sa CSW tungod kay nag-supply lang kini og libreng tambal ngadto sa mga kabus. Wala gi-esplikar sa mayor ang obserbasyon sa COA labot sa giingong pagsapaw sa trabaho sa City Engineering Office ug monitoring team ubos sa buhatan sa mayor lakip na ang CSU ug job order monitoring team. Gipasalig hinoon ni De los Reyes nga dili siya magduha-duha sa pagpakunhod sa mga kawani sa buhatan sa City Hall kung wala na kini kinahanglana. (/GMR)(BANAT NEWS)