CEBU, Philippines - Upat ka manuyopay ang nasikop niadtong Sabado sa gabii sa sityo Estasyon, Barangay Maslog, dakbayan sa Danao. Ang mga suspek giila nga sila si Rizaldo Quiros, 49; Brylle Laurito, 26; Erwin Bolante, 28; ug Jimboy Peston, 34; pulos residente sa maong lugar.
Sumala ni PO3 Phil Restauro, nga nakit-an ang grupo nga nagtapok sa usa ka balay samtang sila nagpahigayon og roving patrol.
Usa sa mga suspek ang aktong nakit-an nila nga nanghatag og mga gamit pang-drugas ug usa ka pakete nga shabu.
Daling gidakop ang mga suspek ug nasakmit gikan sa ilang posesyon ang usa ka pakete nga shabu, tulo ka lighter, tulo ka linukot nga tisyu ug uban pang gamit sa pagsuyop.
Sa pagkakaron, ang mga suspek gitanggong na sa prisohan ug gikatakdang pasakaan sa tukmang kaso. (BANAT NEWS)