CEBU, Philippines - Ang street dancing sa Panagtagbo Festival sa dakbayan sa Mandaue gipahigayon kagahapon nga gisalmotan sa unom ka contingents gikan usab sa gi-cluster nga 27 ka barangay sa siyudad.
Ang makalingaw nga kalihukan gipahigayon sulod sa Mandaue City Sports and Cultural Complex sa Sitio Tribunal sa Barangay Centro maoy nagtapos sa kalihokan.
Pagsuwat niini’ng balita wala pa ikapahibalo ang resulta sa showdown kun kinsa ang maisip nga labing nindot nga pasundayag.
Ang street dancing ug showdown competition sa Panagtagbo Festival maoy kabahin sa indigay diin ang matag contingent mopakita sa ilang kahanas pagsayaw sa kadalanan pinaagi sa pag-ikid-ikid ug pagkiay-kiay dungan sa tugtog sa Panagtagbo Festival song.
Ang ilang pagsayaw nagsukad sa dalan Ariston Cortes Avenue ug misubay kini sa dalan S. B. Cabahug diin nagpahimutang ang mga maghuhukom nga maoy nag-aninaw kun kinsa kanila ang labing maayong mosayaw nga gantihan og salapi. Ang mga sakop sa Taga Mandaue Inc. maoy nagpasiugda sa indigay ug giabagan sila sa mga opisyal sa dakbayan.
Sagad g’yud unta nga ipahigayon ang Panagtagbo Festival sa bulan sa Enero isip kabahin sa pagsaulog sa pangilin ni Senyor Santo Niño diin ang imahen dad-on sa Mandaue gikan sa dakbayan sa Sugbo.
Sanglit karon na man kini gihimo, maisip na kini nga kabahin sa kalihokan karong Mayo 8 atol sa tinuig nga pangilin ni San Jose, ang patron sa dakbayan sa Mandaue. (BANAT NEWS)