CEBU, Philippines - Hayan dili na makabalik sa pagtukod sa ilang pinuy-anan ang mga biktima sa sunog sa Purok II, Sitio Marpa, Barangay Bakilid, dakbayan sa Mandaue.
Kini human gipadayag sa tag-iya sa luna nga ibahin-bahin na kini ngadto sa lima nila ka mga anak.
Nunot niini gitun-an karon sa kagamhanan sa dakbayan sa Mandaue ang pamaagi sa pagtabang sa mga biktima sa sunog sa maong lugar.
Si Bise Mayor Glenn Bercede nga maoy kasamtangang mayor sa dakbayan ug Konsehal Jimmy Ceniza nakigtagbo sa pamilyang Manuel ug Gozala Jayme nga maoy tag-iya sa luna nga gipuy-an sa mga biktima. Atol sa panagtagbo, gipadayag sa magtiayon nga nagplano usab sila sa paghimo og karsada sa taliwala aron dili maglisod sa pagsulod ang mga bombero kun mahitabo pa ang sunog sa maong dapit. Nunot niini si Bercede miingon nga ilang dad-on ang maong suliran ngadto sa Housing and Urban Development Office (HUDO) sa pagpangita og paagi sa pagtabang sa mga nasunugan. Matud ni Bercede nga duha ang kapili-an sa pagtabang sama sa paghatag og relocation site ug ang paghatag og financial assistance.
Gipasabot ni Bercede nga base sa Urban Development Housing Act of 1972 ang paghatag og financial assistance ibase kini sa minimum nga sweldo matag adlaw ug i-multiply sa 60 ka adlaw. Gibana-banang kapin sa 100 ka panimalay nga naugdaw ug kapin sa 200 ka pamilya sa maong lugar nga nawad-an og kapuy-an ang nagkinahanglan og tabang sa kagamhanan. (BANAT NEWS)