CEBU, Philippines - Usa ka establisamento sa Barangay Banilad ning dakbayan sa Sugbo ang nabiktima na usab sa pagpanglungkab ug gisakiyo sa mga kawatan ang P50 mil nga salapi.
Ang representante sa usa ka establisamento nga si Paula Jude Ilusurio Giron, 25, igo na lang midangop sa kapolisan human nadiskubrehan nga ang ilang tindahan sa Maria Luisa Road sa naasoy’ng barangay gilungkab ug nadiskubrehan niadto lang adlaw nga Lunes. Sa pasiunang imbestigasyon sa Theft and Robbery Section sa Cebu City Police Office pugsanon nga giguba ang pultahan sa maong establisamento ug giguba ang steel cabinet sa finance department diin gihipos ang P50 mil cash.
Samtang, lain sab nga kaso sa pagpanglungkab ang nadangat sa TRS sa susamang adlaw human gilungkab ang Anglo-Eastern Crew Management Philippines sa Barangay Kamputhaw ning dakbayan sa Sugbo.
Nadiskubrehan sa kawani sa maong tindahan nga si Daryll Sulima, 27, nga naabli na ang likod nga bahin sa ilang pultahan ug nahanaw usab ang P15mil nga cash sa sulod sa vault sa ilang opisina.
Ang CCPO naalarma na sukad sa miaging semana sa nagsunod nga mga kaso sa pagpanglungkab sa siyudad. (BANAT NEWS)