CEBU, Philippines - Patay na nga napalgan sa iyang silingan ang usa ka 41-anyos nga construction worker sa Pinamungahan, human nga gidakdakan og bato ang ulo niini.
Giila ang biktima nga si Genaro Alvarado, 40, taga Barangay Tubig sa maong lungsod. Sa pakighinabi sa Banat News ni PO1 Ronelo Lawas sa Pinamungahan police station, ang biktima namista sa Sitio Kaisang sa ilang barangay ug tungod sa kahubog giingong nakatulog kini sa maong lugar.
Base sa imbestigasyon sa kapolisan, nibangon pa ang biktima ug nipalit og sigarilyo sa tindahan duol sa crime scene ug mao kadto ang kataposang higayon nga nakit-an kining buhi.
Kagahapon sa buntag, napalgan na lang sa usa ka Dionesio Mahasol ang biktima nga wala nay kinabuhi ug maayong pagkaguba sa nawong niini.
Matud pa ni PO1 Lawas, ilang nakuha sa crime scene ang usa ka bato nga kaparehas og gidak-on sa bola sa volleyball nga mao’y gituhoan nga gigamit pagdakdak sa ulo sa biktima.
Sumala pa sa asawa sa biktima nga si Diacosa Alvarado, nga bisan og palahubog ang iyang bana apan dili kini palaaway ug wala usab kini kontra sa ilang lugar.
“Lisud pa jud pag identify sa suspek kay wala may mo-witness ug kung pangutan-on ang mga duol sa lugar, mangambot man pud sila pero among paninguhaon nga naa na gyuy ma-identify,†asoy ni Lawas. Sa pagkakaron blangko pa ang kapulisan sa lungsod sa Pinamungahan sa motibo sa krimen. (BANAT NEWS)