CEBU, Philippines - Wala’y swerte ang usa ka bana human kini gitigbas sa wala mailhing suspetsado human niya gikatahong gikulata ang iyang asawa diha sa Sitio Upper Banika, Barangay Lahug Cebu City niadtong Sabado sa gabii.
Ang gikulata nga asawa nag-edad og 48-anyos samtang ang bana nga nakaangkon og samad tinigbasan 50-anyos, mga pangalan gipugngan sa Banat News.
Sa inisyal nga imbestigasyon sa kapulisan, nasayran nga sa maong oras nauli sa ilang panimalay nga hubog ang suspek ug naabtan niini ang asawa nga nagpaabot sa gawas sa ilang balay.
Sumala pa nga kalit lang giduol sa suspek ang asawa ug diretso nga gisampalong ang nawong hinungdan sa pagdagan sa ginang palayo apan gigukod kini sa suspek ug dihang naabtan sa ngitngit nga bahin sa lugar gitiwasan niini og kulata ang asawa.
Base sa imbestigasyon sa Homicide Section, dunay usa ka wala mailhing tawo ang mibutho ug misinggit sa pag-ingon: “unsa na!.†Diha-diha nabuhian sa bana ang asawa hinungdan nga nakahigayon kini pagdagan palayo. Apan nahibulong ang ginang nga wala na siya gukda pa sa bana ug wala na usab kini niya makita maong mibalik siya sa dapit diin siya gikulata niini ug maoy iyang naabtan ang bana nga nagbuy-od na nga naligo na sa kaugalingong dugo.
Dihadiha mitawag sa mga silingan ang ginang ug gitabangan pagdala sa Vicente Sotto Memorial Medical Center ang bana nga dunay mga samad tinigbasan sa ulo ug likod. Ang kapulisan apil na ang iyang asawa wa pa gihapon masayod kun kinsa kadto nga tawo nga milaban kaniya, samtang nagpaalim pa sa samad tinigbasan ang bana sulod sa tambalanan. (BANAT NEWS)