CEBU, Philippines - Ang hepe sa Talisay City Police Station (TCPS) Superintendent Reycel Carmelo Dayon naglaum nga mopalit pa og dugang Close Circuit Television (CCTV) camera sa siyudad aron mabutangan pa ang ubang mga lugar.
Si Dayon nga nahinabi sa Banat News nagkanayon nga niini’ng pipila ka adlaw ang milabay, activated na usab ang CCTV sa siyudad.
Matud ni Dayon nga ang Talisay may duha lang hinuon ka CCTV camera ug naa kini ibutang sa Tabunok.
Si Dayon naglaum nga kabutangan unta og dugang CCTV camera ang habig sa Cebu South Coastal Road (CSCR) ilabi na ang mga “accident prone area†ug lugar diin grabe ang problema sa trapiko.
Matud ni Dayon nga ang CCTV daku usab og ikatabang sa pag-ila sa mga kriminal nga responsable sa mahitabong krimen.
Giawhag ni Dayon ang mga opisyal sa Talisay nga ibalhin unta sa daku-daku nga kwarto ang monitor sa CCTV.
Ang monitor sa CCTV gibutang lang sa gamay’ng kwarto sa ubos nga bahin sa City Hall diin ang mag-operate maglisud og lihok tungod sa kahuot sa lugar.
Dugang ni Dayon nga kun may mga camera na sa mga lugar sa lainlaing dapit sa Talisay makita na unya kun kinsa’y mamato sa mga traffic light ug dali ra sila’ng madakpan.
Adunay mga traffic light sa Talisay nga ang bildo buak na tungod kay gibato sa mga badlongon.
Ang mga polis nga magpatrolya maglisud og dakop sa mga badlongon kay iatol man nila ang pagpamato sa suga kun moagi na ang mga polis nga nagpatrolya. (BANAT NEWS)