CEBU, Philippines - Nadakpan sa kapolisan ang usa ka tawo nga nasakmitan og mga pinaketeng shabu ug rifle grenade diha sa checkpoint sa dalan national, Barangay Sabang, Dakbayan sa Danao alas-10 pasado ang takna sa buntag niadtong Biyernes.
Si PO3 Arnold Labine sa Danao Police Station miila sa nadakpan nga mao si Richard Cugal Capongan, 36, taga Barangay Bali-ang sa bukirang bahin sa dakbayan sa Danao.
Matud pa ang checkpoint gipangulohan ni Senior Inspector Cesar Misola ug mga sakop sa Special Weapon and Tactic (SWAT) sa Danao Police Station.
Sa pagkanaug ni Capongan sa habal-habal daw namatikdan nga daw wala kini mahimutang maong ilahang girekisa ang plastic container ug nadiskubrehan ang gisulod niini nga usa ka rifle grenade .
Tungod niini giposasan siya ug gidala sa presinto ug diha usab nasakpan sa bulsa niini ang pito ka gagmay nga pakete sa shabu.
Samtang laing lalaki usab ang nasikop sa sitio Freedom sa barangay T. Padilla sa dakbayan sa Sugbo.
Ang nasikop naila nga si Justine Lausa, 20, kinsa nakuhaan og usa ka kalibre .38 snubnose nga revolver nga may duha ka bala. Matud pa may mireklamong silingan batok sa suspek tungod sa pagdala niini og armas.
Ang mga sakop sa Parian police station pinangulohan ni Sr. Insp. Ardioleto Cabagnot nakaakto ni Lausa nga nagbitbit sa iyang armas maong gisikop kini ug sa pagsusi sa iyang bulsa nakuhaan kini og duha ka paketeng shabu.
Duha usab ka tawo nga sila si Rogelio Alcantara, 18, molupyo sa Sambag Uno sa dakbayan sa Sugbo ug si Jaworskie Aronales, 34, taga barangay Lorega San Miguel sa dakbayan sa Sugbo ang nadakpan tungod sa paghupot og shabu. (BANAT NEWS)