CEBU, Philippines - Monitoron sa kapolisan ang mga kalihokan sa mga mag-rally dinhi sa Sugbo atol na unya sa pagbisita ni Presidente Barack Obama sa nasud karong Lunes.
Si Chief Supt. Danilo Constantino ang Regional Director sa Police Regional Office 7 nagkanayon nga bisan dili dinhi sa Sugbo ang lugar nga bisitahon ni Obama monitoron lang gihapon nila ang mga kalihokan sa mga maghimo og rally sa dakbayan. Sumala pa ni Constantino nga dili lamang sa Sugbo ang himoon nga pag-monitor kondili lukop nasud kining pagabuhaton sa kapolisan.
Apan miingon si Constantino nga walay angay nga kabalak-an sa pagbisita ni Obama ug ang ilang gihimo nga pag-monitor normal lamang tungod kay usa ka lider sa laing nasud ang moabot.
Sama sa mga lider sa mga nasud nga mobisita kinahanglan gyud nga doblehon ang seguridad tungod kay kung lugakan kini peligro nga dunay mahitabo kanila.
Ang pagbisita ni Obama moresulta usab sa pinirmahay sa Pilipinas ug Estados Unidos sa usa ka security agreement aron hatagan og access ang US forces sa mga military bases sa Armed Forces of the Philippines.
Ang maong kasabotan napanglantawang maoy tubag sa Amerika sa agresibong kalihokan sa China sa West Philippine Sea. (BANAT NEWS)