CEBU, Philippines - Nasikop sa kapolisan sa National Bureau of Investigation ug sa Intelligence Service of the Armed Forces of the Philippines (ISAFP) si Cedric Lee ug si Simeon Raz, duha sa pito ka suspek sa pagpamun-og sa actor-comedian nga si Vhong Navarro.
Si Justice Secretary Leila De Lima nga nahinabi sa mga tigbalita sa kaulohan miingon nga si Lee ug si Raz nasikop sa mga NBI, PNP ug sa ISAFP sa lungsod sa Oras sa Samar sa alas 11:15 kagahapon sa buntag.
Matud pa ni De Lima nga pipila na ka adlaw nila nga gipangita ang lokasyon ni Lee hangtud nga ilaha kining natultolan.
Sumala pa ni De Lima nga gikan si Lee ug si Raz sa Quezon ug mipadulong sa Bicol lahos sa Sorsogon ug ngadto sa Eastern Samar diin sila nasikop.
Dugang ni De Lima nga iyang gimandoan ang mga arresting teams nga ihatod dayon ang duha sa Manila. Ang NBI naghulat pa sa commitment order sa Regional Trial Court sa Taguig kung asa gyud ibutang si Lee ug si Raz.
Si Lee kauban sa walo ka tawo gipasakaan og kasong grave coercion and serious illegal detention. Ang serious illegal detention walay pyansa nga gitakda sa balaod.
Si Navarro una nga gipasakaan og kasong rape ni Denice Cornejo apan gibasura kini sa piskalya ug gisundan pa sab kini sa laing duha ka kasong rape diin usa na niini ang gibasura.
Misumbalik og kiha si Navarro ug niining higayona gidawat sa korte ang iyang kaso hinungdan nga miluwat ang korte og warrants of arrest. (BANAT NEWS)