CEBU, Philippines - Nagkurog ang usa ka taxi driver nga mitunol sa iyang kinitaan ngadto sa nagbinugtong nga tulisan nga mitulis kaniya kagahapon sa kaadlawon didto sa Barangay Gun-ob, dakbayan sa Lapu-Lapu.
Si Luciano Peteluna, 42, minyo nga drayber sa SD Taxi mitaho sa kapolisan sa Lapu-Lapu human sa pagpanulis aron katabangan siya nga madakpan ang tulisan.
Si PO1 Glenn Estrada sa Lapu-Lapu City Police Office (LLCPO) Precinct 3, miingon nga misakay sa taxi sa biktima ang nagbinugtong nga lalaki didto sa dalan A.S. Fortuna, barangay Banilad, dakbayan sa Mandaue.
Ang tawo nagpahatod sa Barangay Gun-ob apan ang tawo nga naglingkod luyo sa drayber mition sa biktima og kutsilyo ug mideklarar nga tulis.
Sa kahadlok nga duslakon sa talingkab nga kutsilyo ang iyang tutonlan, gihatag ni Peteluna ang iyang kinitaan nga P4,000.-(/RUB)(BANAT NEWS)