CEBU, Philippines - Gipadayon sa Mandaue City Health Office (CHO) ang paghimo’g kampanya sa kabarangayan aron malikayan ang sakit nga dengue hangtod sa panahon sa mga buwan nga ting-init.
Mata’g karon ug unya mokalit lang sa pagbunok ang ulan ug magbilin kini’g lim-aw sa tubig nga anha makapangitlog ang mga lamok nga maoy magdala og virus sa dengue. Si City Health officer Edna Seno mipasabot sa kamahinungdanon kanunay sa pagpanglimpyo sa palibot aron malikayan nga makapuyo ang mga lamok.
Giawhag ni Seno ang katawhan nga ipangyabo g’yud ang napundo nga tubig nga nahimutang sa palibot sa matag panimalay tungod kay himoon kini nga itloganan sa mga lamok. Matud ni Seno nga ang pagpalimpiyo sa napundong tubig sa mga kanal nga nahimutang duol sa kabalayan mahimo gihapon nga kapuy-an sa mga lamok nga magdala’g dengue virus, apan sagad g’yud anha sa mga flower vase ug sawranan sa tubig sa plato.
Giangkon ni Seno nga ang mga opisyal sa 27 ka barangay sa dakbayan sa Mandaue nagpadayon sa ilang kampanya, ilabi na ang Banilad ug Subangdaku nga adunay mga sapa. Bisan og wala makahatag og statistics si Seno kun pila na ang gidaghanon sa mga natakboyan og dengue sa Mandaue apan iyang gibutyag nga minus karong tuiga kun itandi sa miaging tuig. (BANAT NEWS)