CEBU, Philippines - Andam ang kadagkoan sa SM Prime Holdings Incorporated nga mogasto og minilyon ka pesos alang sa paghimo og karsada daplin sa dagat nga nahimutang kilid sa napalit nila nga yuta sa South Road Properties (SRP).
Ang SM Mall manager nga si Sherry Tuvilla mipadala og suwat ngadto ni Vice Mayor Edgardo Labella agi og pagsanong sa awhag sa Cebu City Council.
Ang mga konsehal sa dakbayan miawhag sa tagdumala sa SM Prime Holdings Incorporated ug Filinvest Land Incorporated (FLI) nga sila ang mohimo’g karsada palibot sa property nga ilang napalit diha sa SRP.
Ang SM nakapalit og 34 hektareyas nga kayutaan diha sa SRP sa kantidad nga P2.7 Bilyones nga gihimoan nila og higante nga mall nga kun kini mahuman usa sa labing daku nga mall sa Asya.
Ang Filinvest Land Inc. nakapalit usab og 10 ka hektareya nga kayutaan nga anaa sa beach front portion sa SRP apan hitsas na kini sa karsada nga gitukod sa kagamhanan.
Matud ni Tuvilla nga andam sila sa SM nga mohimo’g karsada sa seaside nga bahin sa napalit nila nga property habig sa Barangay Mambaling, apan kinahanglan nga ang ilang magasto isipon kini nga advance tax payment ngadto sa dakbayan.
Ang konseho sa dakbayan mitugyan niini nga isyu ngadto sa City Treasurer’s Office aron makahatag ang mga tax collectors og baruganan.
Ang SM nakahatag na og P50 milyones nga advance tax payment kaniadto ubos sa kondisyon nga gamiton ang salapi pagpanindot sa karsada palibot sa SM Mall sa North Reclamation Area ug pag-atiman sa Mahiga Creek. (BANAT NEWS)