CEBU, Philippines - Nagsugod na sa ilang trabaho ang 105 ka mga estudyante ug out of school youth nga nagpangedaron og 15 ngadto sa 22-anyos sa dakbayan sa Toledo ubos sa Special Program for Employment of Students kon SPES.
Matud ni Edwin Abad, head sa Human Resource Management Office (HRMO) sa dakbayan sa Toledo nga nagsugod na og trabaho niadtong Abril 14 ug motapos sa Mayo 14.
Ang mga nadawat gibutang sa nagkadaiyang lokal nga buhatan sa gobiyerno sa Toledo ang maong mga estudyante isip Job Orders.
Magdawatan usab og tag P250 nga suholan matag adlaw ang maong mga estudyante diin 60 porsiyento ang abagahon sa kagamhanan sa Toledo samtang 40 porsiyento sa Department of Labor and Employment (DOLE).
Sumala pa ni Abad nga adunay gipirmahan nga memorandum of agreement ug pagtugot sa mga ginikanan sa mga estudyante ang ilang pagtrabaho ug wala’y nalapas nga lagda sa labor law. (BANAT NEWS)