CEBU, Philippines - Mga pangos ug bun-og sa kalawasan ang naangkon sa duha ka mga pulis human sila gidasmagan sa usa ka motorsiklo diha sa ilang check point sa milabay’ng gabii sa may dalan Tupaz, Barangay Sawang Calero ning dakbayan sa Sugbo. Giila ang duha ka mga pulis nga sila si PO1 Chito Jerome Galua ug PO1 James Myco Labastida nga nadestino sa Police Station 6, kinsa nakaangkon og samad sa tuhod ug ulo ingon man nga bun-og sa kalawasan.
Nadakpan hinuon ang suspetsadong si Johnrey Santillan Tabalin, 21, taga Sitio Camansi, San Roque, ning dakbayan kinsa nakuhaan usab og usa ka paltik .38 kalibre rebolber. Sumala pa sa biktimang pulis, ilang nabantayan ang nagpadulong nga motorsiklo nga ang drayber wala magsuot og helmet mao nga ila kini nga gipahunong.
Apan mipasutoy hinoon kini sa pagpadagan dayon dasmag kanila, apan nakahigayon pa ang duha ka mga pulis pagsikad sa maong motorsiklo hinungdan nga nalukapa ang suspek. Sumala pa nga sa pagkalukapa nakita nila nga dunay armas ang suspek.
Gituohang nahadlok ang suspek pagkakita sa checkpoint maong misuway kini sa pag-ikyas. (BANAT NEWS)