CEBU, Philippines - Ang kadagkoan sa Department of Engineering and Public Works (DEPW) nangatarungan nga ang kalangan paghuman sa ilang survey report kabahin sa pagpanindot sa Mahiga Creek mao ang kakuwang nila og mga kawani.
Si Bernabe Patiño, ang hepe sa DEPW survey section, nga usa lang sila ka team nga gitahasan sa paghimo og survey ug daghan kaayo ang angayan nila nga adtoon.
Matud ni Patiño nga kun ang Mahiga Creek mao lang ang ilang tutokan sa paghimo og survey ug ibaliwala lang usa ang uban tingali dugay ra nga nahuman ang gitahas kanila.
Bana-bana ni Patiño nga ang iyang survey report kabahin sa P6 milyones nga Mahiga Creek beautification project masumiter niya mga duha ka buwan gikan karon.
Si Atty. Jose Daluz III nga maoy pangulo sa Reduction Danger Zones (REDZ) nahiubos tungod sa kadugay sa pagkahuman sa maong proyekto.
Matud pa ni Acting City Engineer Jose Marie Poblete nga adunay daghan’g trabaho ang ilang survey team mao nga dugay nga nahuman ang gitahas kanila. Gipasabot ni Poblete nga magputol-putol ang ilang trabaho tungod kay dunay daghan nga trabaho nga ilang asikasohon.
“Kun mao pa lang na ang atong gi-focus nga trabaho, nahuman na na. Unfortunately, daghan kaayo og request sa lain-laing barangay ug mga proyekto,†matud pa ni Poblete. Giangkon ni Patiño nga 16 na sila karon sa survey team kay gidugangan sila og pito ka bag-ong mga sakop apan dili pa sila bansay sa paghimo sa ilang trabaho. Laing problema nga gipatin-aw ni Patiño mao nga wala sila’y sakyanan nga magamit aron unta makatabang pagpadali sa ilang mga tahas. (BANAT NEWS)