CEBU, Philippines - Duha ang patay samtang lima ang nangaangol sa nahitabong aksidente sa kadalanan sa managlahing dapit sa nakalabay’ng adlaw.
Giila ang namatay nga si Ramon Pacana ,18, lumad nga taga Sagay, Negros Occidental ug kasamtangang nagpuyo sa Climaco St., Barangay Poblacion siyudad sa Toledo, drayber sa gimanehong motorsiklo nga Honda XRM nga adunay plate number 2027GG nga gipanag-iya ni Merlyn Repollo.
Samtang nakaangkon og pangos ug samad ang angkas niini nga si Rodel Ramirez, 30 anyos, lumad nga taga Oriental Mindoro.
Sa imbestigasyon nila ni SPO3 Lorenzo Mahilum ug PO3 Julius Sanchez sa Toledo City traffic division nga gikan sa barangay Poblacion Toledo ang mga biktima ug paingon unta sa barangay Tajao lungsod sa Pinamungajan dihang pag-abot sa barangay Ibo, Toledo nawagtangan sa kontrol ang drayber sa gimanehong motor sa may kurbadahon nga bahin ug mibangga sa railings ug nangalagpot. Gidala sa Toledo City Hospital si Pacana apan gideklarar kini ni Dr. Henry Labus, attending physician nga patay na.
Samtang nakaangkon usab og bun-og ug bali sa kalawasan ang managtiayon nga sila si Romeo Sanchez, 65, ug Esterlita Sanchez, 59, nagpuyo sa sityo Bawod Barangay Magdugo syudad sa Toledo human mabag-id sa bus nga gipanag-iya sa Galeo Equipment and Mining Co. Inc. nga gimaneho ni Jose Ambol, 44, apan temporaryong nagpuyo sa barangay Luray Dos dakbayan sa Toledo.
Base sa imbestigasyon nga gikan sa barangay Talavera ang mga biktima ug paingon sa barangay Magdugo dihang pag-abot sa nahisgutang lugar sa kurbada nga bahin nasaghid ang motor sa bus hinungdan nga nawad-an og kontrol natumba ug nalamba sa konkretong dalan.
Daling gidala sa Toledo City Hospital ang mga biktima apan gibalhin ra usab sa tambalanan sa Sugbo samtang gikustodiya na sa Toledo City Police Station ang drayber sa bus.
Patay usab ang usa ka mananagat human naligsan sa motorsiklo sa sitio Lacaron barangay Pitalo lungsod sa San Fernando.
Giila ang namatay nga si Cunotu Zamora,72, taga sityo Mohon barangay Langtad dakbayan sa Naga.
Samtang nangaangol sila si Michael Sayson, 25, drayber sa Suzuki nga motor nga walay plate number ug angkas nga Clarisa Ann Bacon, 27, pulos taga barangay Liboron dakbayan sa Carcar.
Sa imbestigasyon nila ni PO3 Renaldo Taneca ug PO1 Salvador Saavedra nga kalit nga milabang ang biktima ug wa mabantayi ni Sayson hinungdan nga nabanggaan, dali kining gidala sa Minglanilla District Hospital apan gibalhin sa Vicente Sotto Memorial Medical Center diin kini nakabsan sa kinabuhi.
Si PO3 Majukin Misuari, duty desk officer sa San Fernando Police Station mibutyag nga gitanggong na ang drayber sa motor nga si Sayson ug gikatakdang pasakaan og tukmang kaso. (BANAT NEWS)