CEBU, Philippines - Usa ka 17-anyos nga piniriso ang nakapuga gikan sa Medellin Police Station adtong Miyerkules sa hapon samtang nag-andam ang kapulisan sa release order niini.
Ang 17-anyos nga nakaeskapo taga barangay Kawit, Medellin, nakagawas gikan sa police station agi sa French window sa buhatan sa Women’s and Children’s Protection Desk alas 5:00 sa hapon.
Gikustodiya siya sa kapulisan human kini gipasanginlan nga nangawat sa miaging semana apan ang reklamante nagdumili sa pagpasaka og kaso batok niini.
Si Chief Insp. Fructuoso Lim Jr., hepe sa Medellin Police Station, mibutyag nga si Atty. Aldwin Flores, sa Public Attorney’s Office sa Marcelo Fernan Palace of Justice sa Barangay Dakit, Bogo City, mimando sa pag-turn over sa suspek sa kustodiya ngadto sa ginikanan o sa pagbutang lang niini sa buhatan apan dili prisuhon.
“Minor man gud ni siya, pwede ra i-custody sa police station pero dili sulod sa prisuhan pero ang complainant dili na man modayon og file og kaso,†butyag ni Lim. Usa ka hot pursuit operation ang gilusad aron sa pagsikop pagbalik sa maong batan-on. (BANAT NEWS)