CEBU, Philippines - Didto na sa selda sa Fuente Police Station nahuwasan sa kahubog ang tulo ka sundalong sakop sa Intelligence Service, Armed Forces of the Philippines (ISAFP), human kini gipangsikop tungod sa pagpanion og armas sa usa ka gwardiya sa usa ka disco bar sa may Mango Avenue , sa Camputhaw, kagahapon sa adlaw’ng Martes. Nailhan ang tulo ka mga sundalo nga sila si PFC Leand Bryce Nemil Aujero, 26, lumad nga taga sitio Lobregat Village, Upper Calarian, Zamboanga City, Lovy De la Cruz, 24, nagpuyo sa Apas, Cebu City ug Aljun Diocana, 29, lumad nga taga Dumaguete City, Negros Oriental. Ang tulo gireklamo sa gwardiya nga si Garido Calinawan Ampong, 46, nga nanion kaniya. Si Ampong mikaratil og dagan ug nangayo og tabang sa mga beat police nga nakaestambay sa maong lugar hinungdan nga nadakpan ang tulo. Matud pa ni Police Chief Inspector David Señor ang hepe sa Fuente Police Station nga mag-atubang og kasong kalapasan sa City Ordinance 1929 “Drunkeness†o paghubog-hubog ang tulo ug kasong grave threat si Aujero gumikan sa pagpanion niini og armas sa gwardiya. (BANAT NEWS)