CEBU, Philippines - Duha ka mga armas ang nakaplagan sa kapolisan diha sulod sa Doña Pepang Cemetery sa barangay Carreta ning dakbayan sa Sugbo.
Ang maong mga armas nasakmit sa mga sakop sa Public Safety Company gipangulohan ni PO2 Rey Dosdos, uban sa chief tanod sa Brgy. Carreta, Johnny Lagaras human sila nakadawat og report may kalabotan sa mga armadong mga tawo diha sa sulod sa maong sam-ang.
Pag-abot sa maong lugar ilang nakita ang duha ka wala mailhing tawo nga naglingkod sulod sa maong sementeryo duol sa gate ug kalit nga mikaratil og dagan palayo sa pulis ug tanod.
Diha sa dapit nga gipundohan sa maong mga lalaki na-recover ang usa ka Cal. 9 mm PARA Rifle nga adunay silencer, duha ka mga tag-as nga magazine nga adunay 21 nga mga buhi nga bala, usa ka caliber .45 pistol apil ang duha ka magazine nga adunay 13 ka mga buhing bala.
Matud pa ni PO2 Lemencio Dinopol ang imbestigador sa Cebu City Public Safety Company nga dako ang posibilidad nga adunay dautang buhaton ang duha apan nasakpan lang sa mga awtoridad.
Sa pagkakaron gipaubos na sa ballistic examination ang duha ka armas aron pagsuta kung wala ba kini nagamit sa mga krimen dinhi sa dakbayan sa Sugbo. (BANAT NEWS)