CEBU, Philippines - Nahimong malampuson ang pagselebrar sa 29th Local World Youth Day nga dinhi gipahigayon sa dakbayan sa Sugbo ug gitambongan sa 3,175 ka batan-on gikan sa nagkalain-laing lugar.
Duha ka adlaw ang maong selebrasyon nga gihimo didto sa Blessed John XXIII Seminary nga adunay temang “Blessed are the Poor in Spirit.â€
Tipik sa wali ni Cebu Archbishop Jose Palma mao ang pagpasalamat sa mga batan-on nga miapil sa kalihokan tungod kay bisan og wala’y tulog apan nagpakita gihapon sila sa ilang kadasig ug kamaya.
Si Bishop Palma nahinangop kay bisan pa man sa kusog nga ulan nga mibundak kaniadtong Sabado sa buntag apan nagpabilin gihapon ang mga batan-on.
Dugang ni Archbishop Palma nga angayan nga ipadayon ang Local World Youth Day tungod kay ang kabatan-onan maoy kaugmaon sa simbahan ug maoy instrumento sa pagsangyaw sa pulong sa Ginoo.
Matod sa Arsobispo nga ang Local World Youth Day giduyogan sa sakripisyo sama sa gihimo sa labaw’ng makagagahom nga gisakripisyo ang iyang kaugalingon aron maluwas ang katawhan sa sala nga nahimo.
Daghan og mga kalihukan nga gihimo atol sa LWYD ug usa na niini ang Dialogue with Archbishop diin ang kabatan-onan nahatagan og higayon aron makapadayag sa ilang huna-huna.
Si Rev. Fr. Kit Sestoso, tsirman sa Commission on Youth, mapasalamaton sa mga batan-on nga mitambong. Naglaum si Sestoso nga madala unta sa mga batan-on ang nakat-onan nila gikan sa maong kalihokan ngadto sa ilang tagsa-tagsa ka parokya ug sa ilang pamilya.
Ang Local World Youth Day mao ang labing dakong panagtigom sa mga batan-on sa Archdiocese of Cebu nga pagahimuon matag tuig. (BANAT NEWS)