CEBU, Philippines - Gumikan sa paghot sa iro, usa ka tulisan ang nasikop samtang usa nakaeskapo sa mga awtoridad diha sa sitio Kasanta, Mactan dakbayan sa Lapu-Lapu sa milabay’ng gabii. Ang nasikop mao si Benjie Mendoza Siasar, 31, dunay kapuyo nga residente sa barangay Luz, dakbayan sa Sugbo ug giingong napriso na kaniadto og walo ka tuig sa New Bilibid Prisons tungod sa kasong homicide.
Samtang ang nakaeskapo mao ang usa ka naila lang sa pangalang "Berson" nga residente usab sa barangay Luz.
Matud pa ni Chief Inspector Conrado Manatad, hepe sa Station 2, gitulis sa duha ang mga pasahero sa usa ka jeepney nga sila si Julmay Cuevas, 19, ug Nonabel Pitogo, 20.
Human madawat sa kapolisan ang reklamo, dali silang miresponde sa dapit diin gikatahong nanulod ang mga tulisan, si Siasar miluklok sa kalibunan ug didto nag-ilis og sinina apan gidemalas kay gidumog kini sa mga iro hangtod nga migawas kini sa iyang gitagoan apan nag-atang na niya ang mga polis. (BANAT NEWS)