CEBU, Philippines - Ang mga langyaw ug ang mga tagdumala og resorts nahinangop kaayo sa pagdistino og mga polis nga magsuroy-suroy sa ilang mga dapit aron paglikay nga adunay mahitabo nga krimen.
Matud ni Lapu-Lapu City Tourism Officer Hembler Mendoza nga positibo ang iyang nadawat nga reaksiyon gikan sa mga langyaw ug mga tagdumala sa resorts ug hotels sa presensiya sa mga tourist police. Ang pagdistino og mga polis sa nahisgutang dapit nga sagad dagsaan og mga langyaw maisip nga pagbansay-bansay na’ng daan sa umaabot nga APEC summit sunod tuig.
Si Mendoza miingon nga pipila ka langyaw mibati nga luwas ang ilang seguridad pagbakasyon dinhi sa Sugbo, ilabi na sa dakbayan sa Lapu-Lapu, sukwahi sa ilang nabasahan sa pamantalaan ug makita sa television nga adunay kagubot sa Pilipinas.
Matud pa nga tungod sa gihimo’ng mga pamaagi sa Lapu-Lapu City tourism office pagdani pag-usab sa mga langyaw pinaagi sa social media maoy hinungdan nga mibalik og kasadya ang mga turista sa dakbayan.
Kun unsay kakulangan sa serbisyo sa kapolisan nga ilang makita atol sa summer season mahatagan kini pagtagad sa pagpahigayon na sa summit. (BANAT NEWS)