CEBU, Philippines - Miabot na sa P15 milyones ang tanang donasyon alang sa pagpatukod sa Cebu City Medical Center apil na niini ang “Piso Mo, Hospital Ko†project.
Kini human mibisita ang Vereniging Haarlemmermeer company sa opisina ni Mayor Michael Rama nga pinanguluhan sa ilang presidente nga si Henk Koning aron sa pormal nga paghatag sa ilang P1 milyon nga donasyon alang sa mga tambal ug pasilidad sa maong ospital.
Gitataw ni Koning nga ang maong donasyon wala pa’y labot sa pasilidad nga gamiton alang sa pagpatukod pagbalik sa ospital.
“This is through the help of different people in raising such amount,†matud pa ni Koning sa dihang gipangutana kun diin gikan ang maong kwarta.
Kahinumduman nga ang Vereniging Haarlemmermeer Cebu usa ka charity nga gitukod sa The Netherlands dinhi sa Sugbo nga mipahigayon og fund raising campaign aron sa pagtabang sa mga nabiktima sa bagyong Yolanda dinhi sa kabisay-an sa miaging tuig.
Misaad sab si Koning nga mobisita sa Guba Emergency Hospital aron sa pagtan-aw kun unsa sab ang ilang matabang sa mao’ng ospital.
Lain usab nga P5 milyones nga donasyon ang gihuwat karon sa siyudad sa Sugbo gikan sa usa ka kaliwat sa mayor nga si Chandran Rama, usa ka negosyante og minahan didto sa India. (BANAT NEWS)