CEBU, Philippines - Patay ang usa ka barangay tanod human kini gipusil sa duha ka wa mailhing tawo nga nagsakay og motorsiklo diha sa barangay Gabi, Cordova, niadtong Martes, alas-2 sa buntag.
Giila ang biktima nga si Ernesto Bacus Rensulat, 47, barangay tanod nga mag-sideline og pamasahero og traysikad ug lumulupyo sa nahisgutang lugar.
Base sa imbestigasyon sa kapolisan, si Rensulat nahinanok pagkatulog sa iyang traysikad nga giparking daplin sa dalan dihang giduol sa duha ka wa mailhing tawo nga nagsakay og motor ug gipusil gamit ang usa ka .45 kalibre nga pistola.
Human sa pagpamusil, daling nisibat ang mga suspetsado paingon ngadto sa Cordova Proper. Daling gidala si Rensulat sa Lapu-Lapu District Hospital apan gideklarang dead on arrival.
Gihulagway sa usa ka saksi nga ang drayber nagsul-ob og puwa nga helmet ug ang angkas niini nagsul-ob og itom nga kalo.
Nakuha sa crime scene ang usa ka slug ug lima ka kabhang sa .45 kalibre nga pistola. Nagpadayon pa ang imbestigasyon sa kapolisan pagtino sa motibo sa pagpatay. (BANAT NEWS)