CEBU, Philippines - Duha ka manag-agaw nadakpan sa kapolisan didto sa dakbayan sa Mandaue nga parehong nagluklok og walay lisensya nga armas sa ilang hawak kaniadtong Martes sa gabii.
Sila si Ramil Tano, 33, ug Joebert Batulan, 22, pulos ulitawo ug nagpuyo sa Barangay Guinsay, dakbayan sa Danao wala makapakita og papeles sa ilang armas.
Matud ni Jessie James Galo, sakop sa Presinto 2 sa Mandaue City Police Office (MCPO), nga ang mag-agaw pareho nga nagluklok og tagsa ka .22 kalibre nga revolver nga pulos adunay tagutlo ka bala.
Matud ni PO2 Galo nga ang mag-agaw gidakop nila ni PO1 Emmanuel Gakit ug PO1 Allan Virtucio human nga nagbarug-barog duol sa motorshop sa dalan Sotero Cabahug, Barangay Ibabao, Mandaue.
Ang duha ka polis nagpaayo sa ilang motor didto sa motorshop ug adunay nakahatag kanila og inpormasyon nga may duha ka armado didto sa unahan mao nga dali sila nga miresponde.
Nakit-an sa polis ang duha ka lalaki nga nagbarog daplin sa karsada nga katahapan ang linihokan mao nga ilang girekisa ang hawak nga nagbugol ug nasuta nga nagdala sila og armas.
Giandam na sa kapolisan ang kaso nga paglapas sa Firearms Law nga ipasaka batok sa duha ka dinakpan. (BANAT NEWS)