CEBU, Philippines - Nahibaw-an na g’yud nga ang pagpamutol og kahoy didto sulod sa reforestation project sa Barangay Manipis may pagtugot diay ni Mayor Johnny V. De los Reyes.
Gawas ni Mayor JVR, miatubang usab sa Community Environment and Natural Resources Office (CENRO) kagahapon ang igsoon sa mayor nga si Joel De los Reyes, ug Konsehal Antonio Javerina sa Manipis.
Gihimo kagahapon didto sa CENRO ang una nga husay sa giingon’g illegal nga pagpamutol og mga kahoy sulod sa Osmeña Reforestation Project sa Barangay Manipis nga duol usab sa tunghaan’g elementarya.
Si Javerina miangkon nga sila ang nag-request pagputol sa kahoy kay makahatag kini og peligro sa kabataan kun matumbahan.
Giangkon niya nga iyang gihangyo sa kagamhanan sa Talisay nga putlon ang mga kahoy duol sa tunghaan tungod kay iyang nakita nga delikado kini sa mga tinun-an ug sa mga magtutudlo.
Apan si Anastacio Cabalejo, Forester 3 sa CENRO, miingon nga aduna pay laing husay nga himoon aron mahibaw-an kun unsa’y tulubagon sa mga opisyal sa Talisay ug unsa nga kaso ang posible’ng atubangon sa mga nalambigit sa giingong illegal logging. Mibuto ang maong kontrobersiya dihang si Konsehal Antonio Bacaltos Jr. mihimo og privilege speech nga nagbatbat sa pagpamutol og kahoy diha sa reforestation project sa DENR-7. (/RUB)(BANAT NEWS)