CEBU, Philippines - Usa ka 27-anyos nga babaye naghikog sulod sa iyang gipuy-an nga kwarto kay nagselos sa iyang kapuyo nga gituohan niya nga may relasyon ug sa babaye nga gikainom niini kaniadtong miaging gabii.
Patay na si Ailyn Herodias diha nga napalgan ang iyang lawas nga nagbitay ug may higot nga pisi sa naylon ang iyang liog sa giabangan niya nga lawak sa Barangay Ibo, dakbayan sa Toledo kagahapon sa buntag.
Sa imbestigasyon sa kapolisan nahibaw-an nga sa wala pa maghikog si Herodias nagkalalis sila ug ang iyang 40-anyos nga kapuyo nga si Wilson Nillas Jr.
Kaniadtong miaging gabii si Nillas nasakpan ni Herodias nga adunay babaye nga gikainom ug nagtuo siya nga aduna sila’y relasyon mao nga nahitabo ang panaglalis tali kanila.
Matud pa nga si Nillas migawas sa ilang gipuy-an aron mopalit og pagkaon dihang pagbalik niini nabantayan nga napalong na ang suga ug sirado na ang pultahan sa ilang gipuy-an hinungdan gipugos ni Nillas pag-abli ug misugat sa iyang panan-aw ang nagbitay nga lawas ni Herodias.
Ang babaye gisuwayan pagdala sa Toledo City Hospital apan gideklarar kini nga patay na.
Si PO3 Salvador Samillano Jr. miingon nga himoan pa nila og dugang imbestigasyon ang kamatayon ni Herodias. (BANAT NEWS)