CEBU, Philippines - Nasigpatan dayon sa mga konsumidor sa siyudad sa Sugbo ang dos pesos nga usbaw sa prisyo sa mata’g kilo sa bugas humay nga gibaligya sa kamerkadohan sa dakbayan.
Apan ang National Food Authority (NFA-7) dali kaayo nga nakadepensa sa pagsaka sa presyo sa bugas humay sa merkado publiko sa siyudad. Ang tigpamaba sa NFA nga si Lucy Rosales nga makiangayon ra ang dos pesos nga umento sa bugas humay bisan og panahon karon sa ting-ani.
Matud ni Rosales nga kay mao pay pagsugod sa ting-ani sa kahumayan sa nagkadaiyang probinsiya sa nasud hinungdan nga wala pa makaabot sa kamerkadohan ang mga commercial rice gikan dinhi sa nasud.
Giangkon ni Rosales nga sa pagkakaron halos wala na’y sulod ang mga bodega sa tig-supply of bugas sa kamerkadohan tungod sa kanihit sa gitumod nga mga bugas dinhi sa Sugbo.
Apan gipaniguro ni Rosales nga sa sunod semana wala nay mahitabong increase sa mga presyo sa bugas tungod kay ila nang gisugdan sa pagpabaha sa NFA rice sa kamerkadohan nga gi-import sa NFA gikan sa Vietnam.
Matud ni Rosales nga 1.3 ka milyon ka sako sa bugas ang gitagana sa Central Visayas lamang busa dili mahitabo nga magnihit ang supply nga bugas sa kamerkadohan niining mosunod nga mga bulan. (BANAT NEWS)