CEBU, Philippines - Usa ka konsehal ang misugyot nga paliton na lang sa kagamhanan sa Mandaue ang Cebu International Convention Center (CICC) kay anugon kini nga mapasagdan ra nga giila na nga “landmark†sa dakbayan.
Si Konsehal Diosdado Suico, tsirman sa committee on finance and appropriation, property, planning and development sa Mandaue City Council, maoy mihimo sa sugyot.
Matud ni Suico nga ang CICC joint venture sa kagamhanan sa dakbayan sa Mandaue ug Kapitolyo kay ang dakong luna nga gitukoran gipanag-iya man sa dakbayan.
Gipasabot ni Suico nga kun mahingpit na nga mapanag-iya sa Mandaue ang CICC iyang gipaniguro nga ang kitaon unya niini makadugang sa matigom nga salapi sa panudlanan sa dakbayan.
Si Suico miingon nga sa dili pa himoon ang sabot-sabot pagpalit sa CICC kinahanglang tan-awon una kini sa mga engineer sa dakbayan ang mga kadaut nga naangkon sa maong edipisyo nga namugna sa pag-igo sa linog ug bagyong Yolanda.
Si Mayor Jonas Cortes miingon nga giawhag niya ang konseho sa pagpalabang og resolusyon alang sa mao nga katuyoan pagpalit sa CICC.
Gibutyag ni Cortes nga dili problema ang pagdumala sa CICC kun mahingpit na nga mapanag-iya kini sa dakbayan kay ang Mandaue Chamber of Commerce and Industry andam motabang sa pagdumala niini.(/BDB)(BANAT NEWS)