CEBU, Philippines - Tulo ka mga tawo ang gipamusil sa managlahing dapit ug duha kanila ang patay nga naglakip sa usa ka kanhi napriso kaniadto ug naangol usab ang iyang anak diha sa sitio Cambangyao, barangay Poblacion sa lungsod sa Dalaguete.
Ang namatay mao si Fabian “Pongkoy†Debuayan, 54, mga residente sa barangay Caliongan sa maong lungsod kinsa nakaangkon og mga samad pinusilan sa iyang buko-buko.
Samtang naangol usab iyang anak nga si Loreto Carungay Debuayan,22, kinsa napusilan sa bukobuko apan nakapadagan gihapon sa iyang motorsiklo sa police station ug nakapangayo og tabang.
Matud pa ni PO3 Nelson Paquibal sa interbyu sa DyRC Radyo Calungsod nga luwan sa motor ang manag-amahan nga gimaneho sa anak apan pag-abot nila sa sitio Cambangyao kalit silang gipamusil sa nagsunod nga riding in tandem.
Sa tantong paulan og bala, naigo ang amahang Debuayan ug natagak kini sa motorsiklo apan ang anak mipasutoy og padagan padung sa police station.
Apan wala na maabti pa ang mga mamumuno, gidudahang ang amahang Debuayan ra maoy target sa mga mamumuno nga daling mibiya sa crime scene human kini matagak sa motorsiklo.
Si Paquibal miingon nga duna sila’y gisubay karon nga posibleng may kalambigitan sa pagpatay sa biktima.
Ang biktima matud pa dunay kasong pagpatay kaniadto nga iyang gitagod og tigbas sa tuig 2007 apan na-acquit kini sa maong kaso ug nakagawas sa Cebu Provincial Detention and Rehabilitation Center (CPDRC) niadtong miaging tuig.
Samtang patay ang usa ka manghimoay og lapida nga gipusil sa wala mailhing tawo samtang nagbarog kini sa kilid sa San Fernando Cemetery pasado alas 4:00 sa miaging hapon sa barangay North Poblacion, San Fernando.
Ang biktima naila nga si Joel Siarza, 26, nga molupyo sa nahisgotang lugar.
Base sa imbestigasyon sa kapolisan nga nagbarog ang biktima kilid sa karsada dihang may miabot nga wa mailhing tawo ug mipusil sa biktima upat ka higayon gamit ang kalibre .45 nga pistola.
Daling gidala ang biktima sa Carcar Provincial Hospital apan nakabsan kini sa kinabuhi. Narekober sa kapolisan ang upat ka kabhang sa kalibre .45 diha sa crime scene samtang gisubay pa ang motibo sa maong pagpamusil. (BANAT NEWS)