CEBU, Philippines - Nagtagbo sila si Senate President Franklin Drilon, Gobernador Hilario Davide III ug Bise Gobernador Agnes Magpale atol sa pagbisita sa senador dinhi sa Sugbo kagahapon. Ilang natuki ang problema sa Hall of Justice nga naguba tungod sa kusog nga linog niadtong milabay'ng tuig.
Si Drilon mibutyag nga nakasabot siya sa problema sa Hall of Justice sa Sugbo nga peligro alang sa mga kawani niini ug mga dunay transaksyon sa maong buhatan tungod sa mga nangaliki nga haligi ug bungbong sa maong edipisyo.
Tungod sa maong problema mipadayag si Drilon nga iyang suportahan ang pagpatukod og bag-ong hall justice ug iyang gihangyo sila si Davide ug Magpale sa pagtrabaho niini.
Gipasalig nga mo-request siya ngadto ni Presidente Aquino nga ilakip kini sa 2015 national budget.
Dugang sa senate president nga kun mahimo P500 milyones ang i-allocate nga gahin sa gobiyerno alang sa katukuran sa bag-ong Cebu Hall of Justice.
“I urged Gov. Davide and Vice Gov. Magpale to work and I will assist them to request the president to include P500 million as an initial funding for the propose Hall of Jutice in 2015 National budget,†asoy ni Drilon.
Si Drilon kinsa nahimong chief justice sa Korte Suprema kaniadto mihulagway sa kamahinungdanon nga adunay kaugalingong edipisyo ang mga hukmanan ug kinahanglang dili langayon ang paglihok niini.
Tungod sa suportang pasalig ni Drilon, mosumitir og resolusyon sila si Davide ug Magpale sa Hunta Probinsyal nga mag-awhag sa nasudnong kagamhanan nga ilakip ang maong pundo sa national budget.
Gitataw usab ni Drilon nga di una angay problemahon kun asa itukod ang bag-ong Hall of Justice tungod kay mahan-ay ra ang tanan kun aduna nay pundo. (BANAT NEWS)