CEBU, Philippines - Nabalaka karon ang kapitan sa Barangay Apas nga si Ramil Ayuman nga motumaw ang sakit nga mugna sa ihi sa ilaga ug dengue sa dapit nga gigub-an og panimalay sa Sitio San Miguel, Apas.
Matud ni Ayuman nga dunay mga dapit nga taga tuhod ang giladmon sa tubig nga nagsugod na sa pagkabaho tungod kay ang gawasanan sa tubig gituyo sa pagsirado.
Nagtoo ang kapitan nga gituyo sa pagsirado ang drainage system aron maglim-aw ang tubig ug sa ingon mapugos sa pagpamahawa ang mga nagpuyo sa yuta nga giangkon nga iya ni Aletha Suico-Magat.
Midangop na si Ayuman ngadto sa City Hall aron mapadad-an og mga health inspector ang mao nga dapit sa tumong nga mapugngan ang pagkuyanap sa sakit nga leptospirosis.
Ang ihi sa ilaga makamugna og sakit nga kun mosulod ang kagaw sa samad sa tawo mahimo kini nga makapatay. Matud ni Ayuman nga hayan adunay tigum tali sa mga Magat nga adto ipahigayon sa opisina ni Vice Mayor Edgardo Labella. (BANAT NEWS)