CEBU, Philippines - Ang pagpanulis sa mga LBC outlets sa lalawigan sa Sugbo nakapasagmuyo kaayo sa kapolisan tungod sa wala pag-abag sa tagdumala sa balay-patigayon nga itugyan kanila ang recordings sa closed-circuit television (CCTV) camera aron gamiton sa imbestigayon.
Matud ni Senior Superintendent Noel Gillamac, director sa Cebu Provincial Police Office (CPPO), nga ang LBC outlets sa Barangay Libertad, Bogo City ug sa Barangay Poblacion East, Moalboal wala mihatag dayon sa kopya sa ilang recordings aron unta sa dali nga pag-ila sa mga tulisan. Si Gillamac miingon nga awhag niya sa mga tagdumala og balay-patigayon nga mabiktima og pagpanulis nga itugyan g’yud sa kapolisan ang ilang footage aron magamit nga mailhan ug madakpan ang mga responsable.
Matud ni Moalboal Police chief Edgar Labe nga sige sila og balik-balik sa LBC-branch sa ilang lungsod nga gitulis sa miaging semana aron pagkuha og kopya sa CCTV apan matud pa nga gi-delete na sa management ang file.
“Giingnan ra mi nga magpaabot sa IT nila pero pag-abot sa ilang IT wa g’yud sila mopahibalo unya pabuhaton pa mi’g request…unya gi-delete na diay kuno ang file maayo lang og naa to sila’y back-up copy,†matud ni Labe.
Ang kapolisan nasagmuyo sa gibuhat sa tagdumala sa LBC kay gusto sila nga masulbad ang kaso apan walay kooperasyon ang management.
Kini usab ang nahitabo sa LBC-Bogo nga hangtud karon wala pa gihapon mahatagi og kopya sa CCTV ang kapolisan, matud ni Bogo City Police chief Hermano Mallari.
Ang mga tulisan mikuha og P31,000 gikan sa LBC-Moalboal ug P70,000 sa LBC-Bogo City. Daghan pa nga mga LBC branches nga gitulis kay wala sila’y mga gwardya.Gitataw hinoon ni Gillamac nga dili kini maisip nga “alarming†kay ang LBC outlets lang ang puntariya sa mga tulisan. (BANAT NEWS)