CEBU, Philippines - Drayber og taksi naangol human siya gitigbas sa trabahante sa tigbaligya og manok-inasal kay nasuko nga gi-parking sa biktima ang iyang sakyanan atubangan sa tindahan nga masalipdan ang ilang baligya.
Si Delfin Caminade, 45, taga Barangay Pagsabungan, dakbayan sa Mandaue nakaangkon og tinigbasan dihang giatake ni Jerry Cabusao nga taga Sitio Kanumay, Barangay Labogon, Dakbayan sa Mandaue.
Matud ni PO1 Jerry Pabadora sa kapolisan sa Presinto 3 sa Mandaue City Police Office (MCPO) nga kuyog sa biktima ang 15 anyos niya nga anak babaye nga nagsakay sa ilang multicab.
Gipahunong ni Caminade ang multicab atubangan sa baligyaanan og inasal-manok kaniadtong Domingo sa gabii kay adunay paliton ang iyang anak sa tindahan. Matud ni PO1 Pabadora nga ang suspek miduol ni Caminade ug giawhag sa pag-abante sa iyang multicab kay nakasalipod kini sa tindahan nga iyang gitrabahoan.
Si Caminade wala mopatuo sa awhag kay matud pa dili sila magdugay sa pag-parking. Ang duha nagkalalis ug ang suspek nga si Cabusao misulod sa tindahan ug gikuha ang hait kaayo nga sundang para panghiwa sa manok ug gitigbas si Caminade.
Sa tanto nga pagpanagang ni Caminade nakaangkon siya og mga samad sa iyang bukton. Pagtan-aw sa suspek nga nasamdan na si Caminade midali kini pagsibat. (BANAT NEWS)