CEBU, Philippines - Gibutangan og Closed Circuit Television (CCTV) camera ang Motor Vehicle Inspection Service (MVIS) sa Barangay Subangdaku, Mandaue aron paglikay nga adunay mga sakyanan nga maisyohan og certificate bisan og wala gi-inspection. Matud ni LTO-7 Acting Regional Director Arnel Tancinco nga nakadungog sila og mga tabi-tabi nga bisan og wala diha ang sakyanan maisyuhan gihapon kini og certificate kaniadto nga nagpakita nga nakapasar kini sa road worthiness test. Si Tancinco mibutyag nga ang CCTV gi-instalar kaniadtong tungatunga sa Pebrero ning tuiga aron sa tumong nga wala na’y mga public utility vehicles nga magdagan nga wala makapasar sa road worthiness test.
Matud ni Tancinco nga aron magtinarong ang mga hepe ug kawani sa MVIS gilatid nga manubag ang hepe ug inspectors sa MVIS sa higayon nga madisgrasya ang sakyanan nga bag-ohay lang na-inspection ug mamatud-an nga dili diay kini road worthy. Gitudlo usab sa LTO si Engr. Claro Lumapas nga bag-ong hepe sa MVIS.
Pagka karon kuwang pa og budget ang LTO aron sa pag-upgrade sa kahimanan sa MVIS.
Si Tancinco mibutyag nga ang CCTV camera nga gibutang sa MVIS dili lang kay ma-monitor sa iyang opisina kun dili apil nga makatan-aw niini ang LTO-Manila. (BANAT NEWS)