CEBU, Philippines - Ang kapolisan sa Mandaue nagtinguha karon nga silotan g’yud ang mga drayber og public utility vehicles nga mobiya lang sa ilang pasahero nga mabiktima sa pagpanulis.
Makadaghan na makasinati ang kapolisan og panghitabo nga pagpanulis nga biyaan lang sa mga drayber ang mga pasahero nga mabiktima sa tulis kay naglikay nga sila malangan.
Sagad mahitabo nga ang mga biktima nga wala na’y kuwarta kay gihurot og kuha sa tulisan mapugos sa paglakaw paingon sa police station aron itaho ang ilang gidangatan.
Matud ni Superintendent Crisaleo Tolentino, deputy director for operation sa Mandaue City Police Office, nga gisugyot niya nga pahimoan og ordinansa kini’ng mao nga lakang.
Si Tolentino miingon nga si Konsehal Demetrio Cortes Jr. nga maoy tsirman sa committee on police, fire and penology, maoy ilang gihangyo nga moduso og ordinansahon kabahin niini.
Gipasabot ni Tolentino nga katungdanan sa drayber sa PUJ ang paghatud sa iyang mga pasahero nga biktima sa pagpanulis ngadto sa labing duol nga presinto sa kapolisan.
Gusto usab ni Tolentino nga malakip sa ordinansa ang pagtugot kanila nga mga polis pag-inspection sa blue light alarm sa taxi ug PUJ kun wala ba kini maguba.
Si Tolentino miingon nga angay’ng silotan ang mga drayber sa mga sakyanan nga masakpang depektoso ang ilang alarm system. Ang blue nga suga nga ibutang sa atop sa PUJ o taksi mokidlap-kidlap kun i-switch-on sa drayber kun adunay motulis kaniya aron pag-alerto sa mga polis. (BANAT NEWS)