CEBU, Philippines - Tulo ka tiguwang-babaye nga gidudahan nga mangingilad ug matud pa magdala kanunay og titulo sa yuta kun mamiktima og mga kwartahan nadakpan sa kapolisan sa Mandaue.
Ang mga dinakpan, duha kanila pulos na senior citizens, nga taga Lower Linao, Minglanilla, giandaman na og kaso nga Estafa sa kapolisan sa Mandaue. Ang mga polis miawhag niadtong nabiktima sa mao nga modus pag-adto sa ilang opisina.
Gipugngan lang sa Banat News ang mga ngalan sa dinakpan nga ang dagway daw dili makahimo og salaod apan gitumbok nga kusog kaayo mangilad.
Si Superintendent Crisaleo Tolentino, deputy director for operation sa Mandaue City Police Office (MCPO), miingon nga sulod lang sa Marso niining tuiga nakadawat sila og daghang reklamo kabahin sa tulo ka tiguwang nga mga babaye nga magdala og titulo sa yuta ug motanyag nga ibaligya.
Matud pa ni Tolentino nga ang tulo mopakita sa titulo ngadto sa ilang biktimahon ug motanyag sa pagbaligya hangtod sa pagkalabay sa pipila ka oras nga panag-estorya moresulta na sa pagpangayo og kuwarta ug manglakaw nga dili na mopakita. Si Tolentino miingon nga ang laing matang sa pagpangilad nga ilang gihimoan og pakisusi mao nga ang wala hiilhing mga tawo moadto sa kabalayan sa mga adunahan nga senior citizen.
Duha ka tawo ang kalit lang motumaw sa panimalay sa ilang biktimahon ug magpaila nga sila taga Department of Health (DOH) o nagtrabaho sa buhatan sa gobyerno ug motanyag kini og libre nga serbisyo sama sa masahe o check-up sa dugo.
Ang mokubit sa tanyag sa libre nga serbisyo maoy ilang biktimahon pinaagi sa pagmando nga tangtangon ang gisul-ob nga alahas, pitaka ug dad-on kini sa pagpanglakaw nga dili makabantay ang mga tag-iya.
Gipasidan-an sa kapolisan sa Mandaue ang katawhan nga magmatngon sila nga dili mabiktima sa mga mangingilad nga magpatoo nga mobaligya’g yuta, mo-check-up og pressure sa dugo ingon man ang pagtanyag og masahe.
Tambag ni Tolentino nga kun adunay mga tawo nga mohimo sa maong modus nga mahidangat sa ilang panimalay motawag dayon sila og mga polis aron ang mga mangingilad madakpan. (/RUB)(BANAT NEWS)