CEBU, Philippines - Lain nga duha na usab ka garbage collectors sa barangay dinhi sa dakbayan sa Sugbo ang napositibo sa ilegal nga drugas atol sa kinalit nga drug test kanila kagahapon.
Ang duha ka “loaders†sa mga basura nga napositibo sa shabu mga kawani sa Barangay Lahug. Kabahin sila sa 92 ka kawani sa Lahug nga gipakalitan og drug test.
Mga sakop sa City Office for Substance Abuse Prevention (COSAP) nga gipangulohan ni Dr. Alice Utlang maoy mipahigayon sa surprise drug test sugod kagahapon sa udto. Si Kapitan Jovito Taburada miingon nga tugotan niya nga ang mao nga mga kawani magpa-rehabilitate ug lapas sa tulo ka buwan mahimong himoan na usab sila og drug test.
Apan matud ni Taborada nga dili pa sila sigurado nga makabalik sa trabaho kay atol sa ilang pagkahanaw, hulipan man niya og laing mga kawani nga magsilbi nga “loaders.â€
Sa laing bahin, ang mga sakop sa COSAP mihimo usab og surprise drug test sa mga kawani sa Barangay Taptap, usa ka barangay sa kabukirang bahin sa dakbayan.
Apan sa 58 ka kawani sa Barangay Taptap nga gihimoan og surprise drug test wala’y bisan usa kanila nga namatud-an nga positibo sa paggamit og gidili nga matang sa drugas.
Matud ni Dr. Utlang nga daghan pa nga mga opisyal sa barangay dinhi sa dakbayan nga miawhag kaniya nga ang ilang mga sakop pakalitan og drug test. Nabantayan hinoon nga dunay mga opisyal sa barangay nga dili kaayo estrikto nga taktakon g’yud ang mga kawani nila nga mapositibo sa drug test. (BANAT NEWS)