CEBU, Philippines - Ang operations chief sa Land Transportation Office (LTO)-7 nga si Macario “Macky†Getaruelas maoy laing opisyal sa LTO nga naapektahan sa nagpadayong paglahugay sa mga opisyal nga gipatuman ni Acting Regional Director Arnel Tancinco.
Matud ni Tancinco nga aduna pa’y laing paglahugay nga iyang ipahigayon nga gitumong aron sa pagpalambo sa serbisyo sa LTO ngadto sa publiko. Si Getaruelas gibalhin isip bag-ong hepe sa LTO nga nagbase sa dakbayan sa Carcar, samtang ang kanhi hepe sa Carcar City LTO nga si Joel Maloloy-on maoy gitudlo nga mohulip ni Getaruelas diha sa operations branch.
Gipasabot ni Tancinco nga ang pagbalhin ni Getaruelas og laing katungdanan kabahin kini sa reporma sa LTO nga gipatuman sa Department of Transportation and Communications (DOTC).
Si Tancinco miingon nga gihatagan og katungod si Maloloy-on nga makapili og iyang mga sakop nga moserbisyo diha sa operations branch nga gihulagway nga anaa ang daghang kahiwian kay sakop niini ang pag-atiman sa mga masakmit nga lisensya.
Ubos usab sa operations branch ang pagdumala sa mga sakop sa LTO operations branch ug mga deputized agents nga gitahasan sa pagpanakop sa mga masalaypong drayber.
Gituohan nga duga’ng revamp sa mga opisyal ug kawani sa LTO ang ipatuman sa tibuok rehiyon sa umaabot nga mga adlaw. (/RUB)(BANAT NEWS)