CEBU, Philippines - Nadakpan sa kapolisan ang 20-anyos nga lalaki nga suspetsado sa pagpanulis sa usa ka tawo sa sulod sa iyang balay didto sa Purok 7, Barangay Cubacub, dakbayan sa Mandaue lapas sa tungang gabii kaniadtong Miyerkules.
Ang nadakpan mao si Rudy Vilar, ulitawo nga taga Purok 5, sakop gihapon sa Barangay Cubacub nga maoy gitudlo nga mitulis ni Jessie Baguio, 33.
Si PO3 Manolito Labus, sakop sa Presinto 3 sa Mandaue City Police Office (MCPO), miingon nga nangayo’g tabang sa ilang buhatan ang biktima ug miasoy nga gisaka siya og lalaki sa iyang panimalay ug gitionan siya og kutsilyo.
Matud ni Baguio nga nakuha sa tulisan gikan kaniya ang Samsung niya nga cellphone ug P2,000 nga salapi ug nagdali kini pag-ikyas.
Gitug-an ni Baguio ngadto sa kapolisan nga nakaila siya sa suspek nga nagtulis kaniya nga maoy nakaaghat nila ni SPO1 Tirso Plania ug PO1 Ryan Diamonda paghimo og follow up operation.
Ilang giadto ang balay sa suspek nga si Vilar ug sa ilang pag-abot positibo kini nga giila sa biktima nga maoy nagtulis kaniya.
Si Vilar gidakop dayon sa mga polis ug nakuha pagbalik ang cellphone sa biktima ug nasakmit ang kutsilyo nga gigamit sa pagtulis.
Nanghimakak hinoon si Vilar sa giingon sa biktima nga P2,000 ang iyang nakuha kay matud niya P200 lang ang iyang natulis nga salapi. (BANAT NEWS)